اتشوكليت فوندت (مولتن)

اتشوكليت فوندت (المولتن)

 

 

 

 

الفوندت او المولتن كيك متعارف عند الاغلب باسم سوفليه مع انو السوفلية غير جدآ عن الي ممكن نتخيلو

الحلا دآ سهل جججدآ و فخم كمان اي احد ما يعرف كيف ينعمل ح يفكر القصة انجاز

بس حآبة اقول انو الي متعارف عنو باسم سوفليه  طعمو بعيد شويا عن الفوندت او المولتن الي ممكن تشتريه من كافيه او مطعم

ودآ بسبب الشوكولات المستخدمة بالوصفة طبعا

دي اول تجربة ليا بالوصفة عشان كدا النتيجة ما كانت بيرفيكت بس الطعم رائع

و كسبت منها خبرة اكيد

1- الفوندت لازم يناكل مع الايس كريم عشانو دسم , انا اول كنت مفكرة الايس كريم دلع هههه

2- الفوندت يناكل طازج لا تفكري تحطيه بالتلاجة لانو راح يتنفخ و يصيرلو اشياء غريبة

3- ازا فكرتي تسخنيه بالميكرويف بعد التلاجة انا اقولك  هيا من دحين  ح يقلب كيك

4- ما ينفع يناكل بايت يوم او يومين لانو طعمو يتغير, فريش بعد الفرن ولا احلىى , خيال

 

انا عملت الوصفة من مدونة ياسمين فوزان و ان شاء الله اجرب وصفة الشيف خالد صاحب مدونة توب شيف

 

http://yasmine.ws/chocolate-fondant-with-vanilla-ice-cream-and-raspberry-sauce/

 

ودآ رابط وصفة الشيف خالد

 

http://topchefcooks.com/2012/03/16/molten-chocolate-cake/

 

 التحضير :

اول شي

لازم يكون عندنا قوالب الفوندت ( السيراميك ) قوالب الفوندت مقاسين كبير و صغير

متوفرة في الدانواب في قسم الاواني

انا مقادير الوصفة دي كفت معايا 4 قوالب كبيرة القوالب الصغيرة تكفي 8

 

مقادير التحضير :

25 غرام زبدة
بودرة كاكاو

 

مقادير الكيك :

100 غرام شوكولاته غامقة ليندت 70%
نصف كوب سكر
100 غرام زبدة (إصبع)
2 بيض
2 صفار بيض
كوب إلا شويا دقيق متعدد الاستخدام

 

الطريقة :

الخطوة الاولى : تأخدي الزبدة المذوبة وفرشة، وتدهني فيها القوالب ، بعدين تحطيها في الفريزر لمدة 10 دقايق. طلعيها وادهنيها مرة ثانية بالزبدة الذايبة وخذي كل قالب وحطي فيها ملعقة صغيرة كاكاو، وحركيها لين تغطي كل القالب بالبودرة، وكبي الزايد من القالب

 الخطوة التانية : تذوبي الزبدة والشوكولاته في المايكرويف أو في حمام مائي

( انا افضل في حمام مائي )

 خليه يبرد لمدة عشر دقايق قبل لا تستخدميه  في الخطوة الجاية

في زبدية ثانية اخلطي السكر مع البيضتين وصفار البيضتين لين يصير هالخليط لونو اصفر باهت

  انخلي الدقيق عليه واخلطيه وبعدين أضيفي الشوكولاته الذايبة بالتدريج واخلطيه لين يتجانس كل شيء

صبي الخليط في القوالب وحطيها  بالثلاجة لمدة 20 دقيقة على الأقل.

طلعيها واخبزيها  في فرن مجهز ومحمى على 180 درجة مئوية لمدة 12 دقايق، أو لين تبدأ أطراف الكيك تبعد عن القالب هوا دا الشي الي ياكدلك انها خلاص استوت

لا تفكري تدخلي عود اسنان عشان تتاكدي من نضوجها لانها من الداخل سايحة , بس ح يكون شيء ملفت تغير اطرافها

 طلعيها وخليها تبرد لمدة دقيقتين قبل ما تقلبيها و تقدميها مع الآيس كريم و ممكن ترشي من فوقها سكر مطحون لو حابة

 

 

دا بعد الانهيار ههههههههههههه

بالعافية على قلوبكم ^_^