كوكيز بقطع الشوكولاتة
مرآ أحب الكوكيز و من اول عندي لهفة اني أعملو و اول ما سمحت الفرصة عملـتو , النتيجة حلوة بس انا ما اقتعنت كليا
عشان كدا ح يكون ليا تجربة تانية في الكوكيز بس طعم وصفة الكوكيز دي كانت جيدة
الوصفة دي أخدتها من اليوتيوب و دا رابط المقطع
و دا رابط الوصفة كتابيا
و دآ رابط موضوع مميز لصاحب مدونة توب شيف عن كل شي يتعلق بالكوكيز
يلا نجي للمقادير :
3/4 كوب زبدة غير مملحة (170 غرام )
3/4 كوب سكر بني مطحون
1/2 كوب سكر ابيض
ملعقتين صغيرة فانيلا سائلة
بيضة كبيرة
صفار بيضة
كوبين دقيق متعدد الاستخدام
*( ازا ما كنتي تبغيه قاسي مرا استخدمي دقيق الحلويات )
نص ملعقة صغيرة بيكنج صودا
نص ملعقة صغيرة ملح
كوب او كوبين رقائق الشوكولاتة (هيرشي )
الطريقة : سخني الفرن 180 درجة و ذوبي الزبدة و حطيها في زبدة في التلاجة لين تبرد
في وعاء انخلي الدقيق و الملح و البيكنج صودا
بعدين في وعاء خلط عميق حطي الزبدة المبردة و السكر الابيض و البني و تخلطي لين يتجانس
ضيفي البيض للخليط و بعد ما ينخلطو نضيف الفانيلا
بعد الخطوة دي نضيف خليط الدقيق و نخلطهم لين يتجانسو
و نضيف التشوكليت ونخلط تمام عشان تتوزع بكل العجينة و نشكلها دوائر في صينية عليها ورق زبدة
و خلي بينهم مسافات لانها راح تمدد بالفرن و اعملي دوائر الكوكيز صغيرة
لانها بتكبر
و نحطها بالفرن بما انو الفرن حار راح تجهز بي 15 - الى 20 دقيقة
على العموم الكوكيز اول ما تحسيه صار لونو ذهبي طلعيه من الفرن لانو لو طول
بينحرق بيصير طعمو يقرمش اكتر و قاسي اكتر
و لا تعتمدي على انك تحطي شوكة او عود اسنان عشان تعرفي انو استوا او لا
لانو في الفرن يكون جدا رطب و رقيق بس بعد ما يبرد يصير قاسي
طبعا تقدم بعد ما تبرد و تحفط في علب
ونصيحة لا تخلي الاطفال يكترو منها لان السكر الي فيها تديهم طاقة
و بيجننوكي شقاوة
و بأذن الله ليا تجربة تانية في الكوكيز
و بالعافية على قلوبكم ^_^
تعليقات
إرسال تعليق